‘Dad, your sweet memory will always comfort me.’
Kum 14 kal taa ka nu boral tum kha chuan ‘Ka pa a la dam alawm’ tiin kan la inhnêm thei deuh a. Mahse August 26-a ka pa lehzelin min han boralsan kha chu a râpthlâkzia leh khawhar thlâkzia mihring tawnga sawifiah ngaihna a awm lo va, chêtziaa tihlan sên a ni hek lo. Ka pâ thih vanga kan lungngaihna leh manganna te hi tui len botir theih nise tuifinriat te meuh pawh khu an tam tâwk lo va, leia chhilh bo theih nise Himalay tlâng te saw râwt hniam bawih pawh ni ila, a la khuh zo chuang awm lo ve.
Ka pa ngâia kan lunglênna leh khawharna te hi kum khata hunbi inher chhuak zelte hian a la rawn tithar dâwn chauh a ni. Favang ni chhuak êng mâwi tak leh van dumpâwl thiang kûk maite khian a hmêl min ngaihtir ang a. Tlângkâr Zotui thiang luang del del leh phairuang thle siau siaute chuan min la vel nawn fo ang. Hunbi neia hram thin nungcha tinreng, rêngchal, ngirtling, chêpchêp leh daihnai vate hrâm chenin kan rilru tithartu an la ni dâwn si a. Tin, thlasik khaw vâwt seng seng leh krismas boruak tiboruak zualtu tlangsam pâr vul chêk chûkte chu kan mittui titlatu an la ni dâwn chiang mai. Thlasik zan boruak thiang kûk maia arsi chhiar sên loh phe neuh neuh leh thlasik kawng paw chik chêk kârahte khian ka pa hmêl kha kan la zawng leh ang a. Mahse chungte chu beidawnna beidawnthlâk, duhthusam saruak, rauthla lêng mai an ni.
Thâl khaw ro hun a lo thleng ang a, kangvâr dum hiam huam leh khaw lum vung vung te, laiking bêl rawh mem mem leh khâm râng thâng ro hmun kâra vaube pâr vul chêk chûk te, fartuah pâr tlân sava hrâm chêl chulte chuan ka pa hova kan ramvah lâite kha min la ngaihtir hle dâwn a ni. Chutah to haw hun a lo thleng ang a. Thlipui inmung boruak reh vung vung chu chhûm dum inhrosa let but butin a rawn zui ang. Chung vanrial rum leh khawpui ri dur dur kâra kâwlphe zuai zuaite chuan ka pa kan thlamuanpui thinzia te kha min hriatchhuahtir dâwn a ni. Fur khua a chenin kan ngai zual deuh deuh ang a, khua a thatin lunglên a kiam dâwn chuang si lo.
Tunhma chuan khawvel hi ka pa phên atang vekin ka thlir thin. Lungngaihna te lâwmna te, buaina leh manganna te hi ka pa atangin ka teh a. Ka khawvel hmuh ve phâk Arabian tuipui kam tiaupho atanga Rûn luiin Chindwin a finna Kalewa khawpui inkâra thil hlâ leh hnâi ka tehna pawh ka pâ awmna Thingsulthliah khua vek a ni.
Kan tleirawl laia Pu S.Lalkâmlova kan kohhran rawn tlawh chuan ‘Piangthar se sû lo mah ila nu leh pate thu awihna hrim hrimah hian malsawmna a awm,’ tiin a sawi a. Hei hi ka theihnghilh thei tawh lo. A thusawi dikzia leh nu leh pa thu awih hi damreina a nihzia chu hetiang hian han sawi ta ila. Hman deuh khân kan khaw thlanmual pahnihah kum sawm chhunga mitthi kum 40 hnuai lam leh an thihchhan ka chhui vak mai a. Chuta ka hmuhchhuah chu kum 40 hnuai lam thi zingah hmeichhia an tlêm em em a. Mipa thi zingah za zela sawmkua vel chu nu leh pate thu awih lo leh a kaihhnawih vanga thi an ni. Vanduai vang liau liaua thi zawng an awm ve teh meuh e. Mahse an tlêm khawp mai.
Nu leh pate hlutna hi hre ve viauin ka inhre thin a. Mahse an dam lâia hria emaw kan intihte kha chu ‘A then pawh kan hre thei lo; he lui kam atang hian,’ tih hla ang chauh kha a lo ni. Tuna nu leh pa la neite hian in vanneihzia hriain in nu leh pate kha duat viau mai teh u. An thu pawh awih hle mai tur. Nu leh pate thu awihna-ah hian malsawmna a awm si a.
“I nu leh i pa chawimawi rawh,” (chu chu thupek tiam nei hmasa ber a ni)
“Chutichuan, i tan a tha ang a, leiah hian i dam rei bawk ang.” Eph 6:1
No comments:
Post a Comment