Khawvel Puma Kristiante Dinhmun leh Hmabak

Khawvel sakhaw hrang hrang zinga tam ber nihna lo hauh reng tawh thin leh hauh mektu kristian sakhaw dinhmun tawn chhoh mek leh a kal zel dan tur nia kan rin han ziak ila. Tin, kohhran mal kan thlur vak dawn lo va, amarawh chu kohhran tam bik Catholic leh kohhran eng engmaw hmingte chu kan thailang zauh zauh lo thei lo. Chutiang thilah pawh chuan kohhran mal thlur duh hrim hrim vang ni lovin Kristian hrim hrim thlirna atanga sawi chhuah tho an ni ang.

  
Kum 2009 khan United Nations chuan kum 2011-ah chuan khawvel mihring hi tluklehdingawn sarih (7,000,000,000) tling turah an ngai a. US Census Bureau chuan kum 2010 hian mihring 6,859,500,000 awmin an ngai bawk. Heng zinga za zela 37 vel, mihring tluklehdingawn hnih leh maktaduaih za vel chu Kristian kan ni a. Kristian zinga za zela sawmnga aia tam hret tur chu Catholic an ni bawk.

Ama’rawhchu zirtu hrang hrang zir dan a inan loh thin avangin khawvela kristiante dinhmun diktak chu hriat theih a ni mang lo va. Sakhaw lian ber, zuitu tam ber leh hausa ber a nih thu erawh hi chu huai taka sawi ngam a ni. He sakhua hian harsatna hrang hrang a lo paltlang tawh a. Tihduhdahna rapthlak ber ber tuar chhuakin khawvel roreltu dinhmunah a inhlang kai ta a ni.

Kristian sakhuain tunlai khawvela thil a tawn chhoh mek hi kawng hnihin thlir ta ila. Chunte chu (i) A lawmawm lo lam leh (ii) a lawmawm lam zawngin. A lawmawm lo lam hi thlir hmasa ila a tha ang.

 

Kristian Dinhmun Lawmawm Lo Lam

Khawvel puma kristian dinhmun chu a hnuaia mi ang hi a ni.

Christian -        2,199,817,400

  Roman Catholics   -    1,121,516,000

  Independents*        - 433,096,000

  Protestants             -   381,811,000

  Orthodox               -   233,146,000

  Anglicans              -    82,586,000

 

A chunga a number en khi chuan kristian nih hrim hrim hi a thlamuan thlâk hle mai. Tunah hian khawvela sakhaw zuitu ngah ber niin khawvel ram changkang deuh deuh hi kristian ram an ni.

   Amarawhchu tun hnu, a bikin kum zabi 20-na tawp lamah hian kristian sakhua hi a thang chak ta lo riau mai. Kohhran mal lo thang chang bikte chu awm bawk ma se a tlangpuia lakin kan thang chak lo va. Chu bakah kristian la inti ve chang chang, inkhawm thlahdah em em, sakhaw dang vuan chuang lova awm mai mai kan pung ta a. A sawrkar lamah pawh thil kan tithei lo tial tial niin a lang. Chumi entirnan chuan kristian sakhaw pu darhtu Europe khawmualpui atangin en hmasa ila. Chutah pawh chuan tunhmaa thuneihna chang tam bertu Roman Catholic hming kan sawi zing ber lo thei lo vang. Anni dinhmun hian kristian dinhmun a entir chiang ber em ka hre bik lo. An niin an entir loh chuan an aiawh tur midang an awm bik chuang awm lo ve.

Europe khawmualpui chhim lam France, Spain, Italy, Portugal leh Ireland te, Europe hmar chhakah Poland ram te khu Europe-ah rau rau pawh Catholic tamna ram, thu an neih theihna tur ber an ni a. Tunhma phei chuan a lal pawh an lal viau a ni.

Mahse tunah chuan thil awm dan a danglam ta. Kum 2005-a Eurobarometer Poll 2005-in mipui ngaihdan a lakna-ah chuan European Union (EU) member rama mihring 52% chauhin Pathian an ring a. Za zela 27 te chuan thlarau engemaw thiltithei deuh chu awm ve ngeiin an ring a. Za zela 18 te phei chuan a engahmah an ring lo hrim hrim. Zaa pathumin an chhang duh lo thung. A bikin heng ram Netherlands, Belgium, United Kingdom, France, Germany, Finland , Norway, Sweden, Denmark, Spain, Poland leh Czech Republic-ah te hian sakhaw ngaihsak lo an pung nasa a. A sawi uar deuhte phei chuan Kristian ram tia sawi ngam an ni ta meuh lo an ti. Mahse hei hi chu an uar ve mai mai a ni ang. Entirnan France mipui za zela 88 chuan Catholic niin an insawi a. Mahse inkhawm peih tak chu za zela panga emaw chauh an ni. Za zela 60 chuan an inkhawm ngai lo hrim hrim a, sakhuana lam an ngaihsak lo hrim hrim an ti.

Kum 2000 kan Sweden ram mipui za zela 82.9 chu kristian an ni a. Kum 2008-a han kai meuh chuan za zela 72.9-ah a tla thla a, kum riat chhungin zaa sawm zetin an kiam hman a ni. Hetiang deuh hi ram danga thil thlen dan a ni ve tho ti ila kan sawi sual lutuk lo vang.

 

A. EU leh Sakhuana

European Union chu India ram ang bawka sakhaw tihbik nei lo ram an ni. Member 27 an awm mek a. A hming chuan kristian ram vek an ni naa EU danpuiah chuan sakhuana lam hawi reng reng an ziaklang duh lo. Constitution-a Pathian leh Kristianna thu thailang ve tura a ngenna-ah Pope thiltithei bera sawi Pope John Paul II meuh pawh kha a hlawhchham der a. Lisbon khawpuia EU constitution an siam that a, remna an ziah pawh khan Pope rawtna chu an hnawl hmak a. Kum 2004-a EU Parliament-a Justice Commissioner  tura Rocco Buttiglione-a rawt a nih pawh khan neih inang inneih chungchanga pope ngaihdan thlawptu a nih avangin an hnar thak a. Chutihlaiin pope leh kohhran dangte pawhin an duh loh em em mawngkawhur Peter Mandelson-a  chu Trade Commissioner atan parliament chuan an nemnghet lawi si.

EU vêk hian Sandbaek Report bawhzuiin nautihtlâkna lam hawi atan pawisa a dah belh a. Hei hi Pope leh protestant kohhran thenkhat pawhin an duh lo hle; mahse EU chuan an pass lui si.

Stem Cell Research pawh Catholic chuan an sawisel ngar ngar chungin EU chuan a remti tho.

EU parliament chuan an member ram zawng zawngah neih inangte inneihna pawm chu compulsory-ah ngai turin dan a pass bawk a. Hei hi kohhrante chuan an duh lo viau bawk.

Roman Catholic hlang deuhthaw awmna, Catholic kohhran kutke tangkai ber ber Dominicans, Jesuits leh Opus Dei lo chhuahna  Spain-ah chuan ‘kohhranin sawrkar a thunun tur a ni lo,’ tih thupui hmanga campaign ngam Spanish Socialist Workers' Party hotu José Luis Rodríguez Zapatero -a chu kum 2004 khan Prime Minister-ah an thlang mauh mai a. Office a luah hnu rei lo tê ni 1 July 2005 khan mawngkawhur inneih chu sawrkarin dana a pawmna turah hming a ziak a. Hei hian Catholic kohhran a tithinur nasa a. A dan siamthar chu duh lovin Madrid-ah kohhran chuan kawngzawhna a buatsaih a. Heta an kawng zawh hi sawrkar official lam chuan 166,000 niin an sawi a. A huaihawttu lam chuan maktaduaih chuang niin an insawi ve thung. Kum 2007 khan Gender Identity Law a pass leh a. He dan ang hi chuan tuai, patil leh mawngkawhur kan tih ang chi hi sawrkarin dan angin an nihna a pawm tawh dawn tihna a ni.

Hetiang hian kohhran duh loh zawng dan chu pass fovin kohhrante pawhin kawng han zawh khum mup mup thin mah se mipui tam zâwk rilru-ah kohhran chu a tla na tawh lo va, kum 2008 inthlanah pawh a tling nawn leh thei tho a ni.

Europe ram dang ang bawkin Spanish thalaite hian inkhawm an ngaihsak lo hle; za zela 14 chauhin sakhaw mi-ah an inchhal a. Puithiam an tlêm tial tial a, nupa inthen an tam tawlh tawlh a. Catholic kohhran chuan nau pâi thei lo tura indan hi dodal viau mah se nau piang pawh Europe-ah chuan a tlêmna pâwl a ni. Jesuit enkawl lâi Pontificia Comillas University, Madrid-a Jesuit Professor  Jose Ignacio Viton pawhin, ‘Kum 15-20 chho vel atang khan kohhran tihdan zawmtu an kiam chak em em mai a. A inkhawm peih chhunte pawh tar lam hlir an ni. =halai an awm ta mang lo,’ a ti.

Pope chuan EU member-te chu tunhma lama Europe khawmualpuiin kristian sakhua a dah chungnun dan hre reng tura a duhna lamah protestant kohhran hrang hrangte thurualpuiin Sunday ni chu chawlhna nia puang turin a ngen a. Chutianga dan puitling ni tur chuan parliament member 394-in an pawm a ngai a. An sawi ho hun tur May 9, 2009 thlen hmaa member-te hmin ngei an tum a ni. February thlaa an han campaign chu member 59 chauhin an lo thlawp pui thei ta mai a. An rin angin  kohhran chuan mi rilru a lo hneh ta hauh lo tih an hre ta a ni. Ama’rawh chu an beidawng mai lo va. Kum 2010 a lo thleng a, Conference of European Churches chuan theihtawp chhuaha phungbawm sawmin Sunday ni chu chawlhna nia puang turin an la nawr ngar ngar a. An tum ber nia lang chu Sunday ni hian sumdawng campany-ten an hnathawktute chhawr lui lo se, a duh apiang chawl se, chhungkua awm ho tam ila an ti a ni ber. He thil nawrtute hi an neu lo asin - Orthodox Christian pâwl 120, protestant te, Anglican te leh Catholic bâkah an zawmpui pâwl dang 40 zet an la tel bawk.

Inkhawm tha peih an awm si lo va, heti zawnga tanlak mai hi an tihtheih awm chhun a ni. Heta an thil nawr dan chu Sunday hi serh hrim hrim ila, tih lam ni lovin Sunday nia hnawthawk thin inkhawm duhte chu anmahni chhawrtuten chhawr lui lovin inkhawm phalsak se, chutiang tur chuan sawrkarin dan siam se an tihna a ni ber.

Portugal  pawhin kumin 2010 January 8 khan Catholic kohhranin an do ngar ngar neih inang inneite pawmna dan chu a pass ve leh ta mauh mai a. Pope chu a iak a iak naa engahmah an ngai si lo. Tin, Europe-a Catholic ruh berna rama mi tam takin an sawi Ireland meuh pawhin fatihtlâk leh neih inang inneite chu dan anga pawm tur em ni tih an ngaihtuah ta thuak thuak mai. A hrim hrimin Ireland-ah meuh pawh khuan puithiam tur an inhmu zo ta meuh lo; kum 2008 khan puithiam pakhat chiah nemngheh thar tur an nei.

France sawrkar chuan tunhnai mai 16 July, 2009 (Ningani) khân Sunday ni (19-7-2009) atanga hman tan turin Sunday nia dawr hawn an khap thin chu thlah dul turin dân an siam thar a. Khualzin mite kal tamna hmunahte chuan miin an duh phawt chuan Sunday-ah dawr an hawng thei tawh dâwn a nih chu. He dan thar hi parliament-ah a duh lam vote 282 niin a duh lo lam vote 238 a ni. Ka thu hnar hi Reuters a ni a. An daw hauhin ka ring lo.

Hetia Roman Catholic bik ka han sawina chhan chu Europe-ah pawh a tam ber an nih vang leh thiltithei ber tura ngaih an nih vang a ni ber. Anni thu meuh pawh an zawm loh a, an runluih sak sak ngam chuan kohhran dangte hi chu engmah kan ni tawh lo tihna a ni a, chuvangin ka sawi lang ta vak lo law law a ni.

Mi thiam tak takin Europe-a kristian-te khu an zir reng a. Heng mi thiam Georgetown University’s Center for the Study of Global Christianity  a thawk te,  Masterhausen-Hunsruck Agency, Germany ten an zir danin  Europe-ah inkhawm an tlêm hle a. World Values Survey (Institute for Social Research, University of Michigan) ten an chhût danin Poland-ah chuan mi za zela 50 chuang regular takin an la inkhawm peih a. Europe ram danga mite chu hetiang hi an ni:

 

Italy - 45%

Spain - 25%

France - 21%

Austria and Switzerland - 15%

Sweden and Finland - 4%

EU chhût dan phei chuan Italy hi za zela 20 hnuai lam an ni a. Germany, Ireland, leh France te sawmhnih hnuai lam daih an ni. Sawi tawh ang khan Paris-ah chuan za zela panga emaw chauh an inkhawm peih tawh a, a inkhawm peih chhunte pawh tar lam hlir an ni.

Hetiang zela kristian sakhuain tlâkhniam lam a pan chuan tun kum za chhung hian Europe khu Mosolman ramah an inlet hman ngei dawnin chhut mi tam tak chuan an ngâi a ni. Tunhma chuan Syria, Lebanon, Turkey leh Africa khawmualpui, Mediterranean tuipui kama awmho khu kristian ram vek an ni a. Mosolman-hovin an dawlh zo ta vek a nih khu. Tuna Europe-a Islam sakhaw zuitu an pun chak dan en khu chuan hlauhawm tak a ni. Amarawhchu hei hi rinthu a ni tih hriat reng a tha ang.

Kum 2010 July 21 khân Argentina ramah pawh an President, Cristina Fernandez de Kirchner-i chuan nasa taka an sawiho hnu-ah mawngkawhur inneihna dan thar chu a hming a ziah hnan a. Hei pawh hi Catholic kohhran chuan an sawisel nasa a. Mahse a duh lam vote 33, a duh lo lam vote 27 niin a tlang ta tho va. He dan thar hian president tanglai dinhmun chu tihchhiat ahnêkin kum 2011 inthlanah pawh a pasal Nestor Kirchner-a chu president-ah a tlintir leh thei hialin an ring zawk a ni.

Argentina rama Catholic kohhran hruaitu Cardinal Jorge Bergoglio-a chuan a sawisel nasa a, a sawt hlei lo. Argentina ramah khuan Catholic maktaduaih 33 vel an awm a. Chu chu a ram mihring za zela 89% vel an ni. Kum 1999-a mipui ngaihdan an lâkna-ah chuan mi za zela 78-in Catholic niin an inchhâl a. CIA Factbook chuan za zela 92 an ni a tithung. Mahse za zela 20 emaw chauh an inkhawm peih a. Sakhuana an ngaihsak lo tial tial a. Europe khawmualpuia Catholic ramten Pope duh loh zawng dan an pass hmiah hmiah ngam ang deuh an ni ve tan ta.

Gay marriage hi Catholic khawpui tihngam Mexico City-ah leh Uruguay-ah pawh dan anga phal a ni a. Chile president Sebastian Pinera pawhin an ramah gay marriage hi phal ve mai tur emaw ni a ti. RD Magazine-in a sawi dan phei chuan Latin America-ah hian nautihtlâk pawh an phal têp tawh a ni.

Khawvela Catholic tamna ber Brazil pawhin pope duh loh zawng tak nautihtlâk hi phal ve mai tur a ni tiin president chuhtu zinga lar ber pawl Dilma Rousseff-a chu a tawng chhuak tawh bawk.

Hetiang hian khawthlang lama kohhrante chuan mipui rilru an hneh tawh lo hle a. India rama Hindu kutpui an hman thinah hian mingo an tel tam tial tial a. Buddhist-ho thiltih khawm nikhua-ah an hmêl a lang tam sâwt viau bawk. A bikin Catholic kohhran hian a mite a thunun lo nasa tih chu tlang hriat a ni.

Florida International University-a thawk Professor Ana Maria Bidegain thusawi hian a tichiang viau mai. Letling lovin a sap tawng ngai ngai hian dah ila a chiang awm e: “Evidently the Church has been losing presence and influence regarding political decisions, which is part of a secularization process. People are still Catholic and they still believe in the fundamentals … but they no longer agree with what (the Church) says regarding morality.”

Europe Khawmualpuia Catholic Tlâkhniam Dan

Kum 1952 khan Spanish Catholic Church chuan seminarian 7,052 an nei a, kum 2002-ah chuan 797 chauh an nei tawh.

Kum1980 khan French rama Catholic Church chuan puithiam 35,000 an nei a. Kum 2000-ah chuan 19,000-ah an tla thla a ni.

Kum 1989 khan German Church chuan puithiam thar 297 an nemnghet a. Kum 2002-ah chuan mi 131 chauh an nemnghet.
      Kum 1989 khan German Church chuan seminarian 1,667 an nei a, kum 2002-ah chuan 1,035 chauh an nei tawh.

Hetiang bawk hian Ireland ramah te pawh an tlahniam nasa hle; sawi peih a thu a ni. Catholic hi a tam ber an nih avangin kan sawi lo thei lo va. Kohhran dangte pawh eng ruai an ang lo tih hriat tur.

Kum 2010 August thla chho vela Pope-in England ram a tlawh chu mi tam takin an sawisel a. November thla tir lama Spain a zin phei chu mipuiin an duh lohzia entir nân kawngte an lo zawh khum a. A runluih nân a huat zawng ni ngei tura an hriat mipa leh mipa infawh runpui te an huaihawt bawk.

Hetiang tak hian Europe lamah chuan sakhaw hruaitute an sawiselin an do ngam tawh a. Hei hi tunhmaa thil thleng ngai lo a ni.

B. America Lam Dinhmun

America khawmualpui lam chu Europe lam ai chuan an la kristian deuh e. Amarawhchu anni lam pawhin sakhuana an la lâp tial tial. Kum 1999 khan Taylor Nelson Sofres Intersearch chuan Millennium Study tiin America rama kristian chanchin an zir a. Chuta an zir chhuah dan chu:

 

Kar tina inkhawm –

USA - za zela 43,

Canada – za zela 20

Inkhawm ngai miah lo –

USA – za zela 8,

Canada za zela 38

Mipui ngaihdan la tute hian kum engemaw zât an la tawh a, ‘kâr hmasa khan i inkhawm em?’ tih zawhna chhanna result pawh a inang deuh pût hlawm. Tunhnai deuha mipui ngaihdan an lâkkhawmna resulth chu hetiang hi a ni.

National Opinion Research Center  - 38%

Institute for Social Research's World Values, University of Michigan – 44%

Barna Research Group (2005) – 47% (He mite pawlin mipui an zir chiannaa a result thenkhat chu hetiang hi a ni.

1991: 49%

1992: 47%

1996: 37%

1997: 43%

2000: 40%

2001: 42%

2002: 43%

2004: 43%

 

Gallup Poll-in tunhma atanga, ‘Tun ni sarih chhûng khan biak inah emaw, synagog-a emaw i kal em?’ tih zawhna an lo zawh thin chu hetiang hi a result a ni:

1992: 40%

1993: 40%

1994: 42%

1995: 43%

1996: 38%

1997: 40%

1998: 40%

1999: 43%

2000: 44%

2001: 41%

2002: 44%

2003: 41%

National Election Studies-in a zir dan chuan kum 1996 khan American puitling za zela 25 chu kar tin an inkhawm a. Za zela 12 kar tin deuhthaw, za zela 16 thla khatah vawikhat emaw vawihnih emaw, za zela 18 kum khatah tlêm tê, za zela 30 inkhawm ngai miah lo.

Hetianga an han zir chian hian za zel 40 te chu la inkhawm thin angin an chhût a ni.

The Gallup Organization chuan kum 2001 May thla khan an zir a, za zela  41 te chu la inkhawm thin niin an zir chhuak bawk.

 

Opinion Poll-te  An Dik Em?

Heng public opinion poll buatsaihtute hian mipui ngaihdan diktak an zâwt chhuak zo lo tih an pha lo. Inkhawm ngai lo tam takin inkhawm lo nih hrehin inkhawm anga insawi an ching hle. Inkhawm chu tha an ti a, inkhawm lo nih an zak bawk a. Chuvang chuan an nihna diktak sawi lovin an nih duha kha ni angin an insawi thin. Hetiang hi a sap tawng takin ‘social desirability bias’  an ti. Entirnan Barna Research-in ‘Sawma Pakhat i pe thin em?’ tih an zawhna-ah American mi za zela 13 chuan ‘Pe thin e’ tiin an chhang a. Mahse a tak tak, kohhran record lam atang chuan za zela pathum chauhin an pe si.

Gallop Poll-te ang chi hi mipui tam zâwk chuan dâwt sawi thei lo ang deuhthaw-ah kan dah a. An thil zir chhuah, a figure-a an rawn dah ang reng reng thudik sawiin kan lo sawi hmiah hmiah thin. Mahse American-ho khuan vote thlak chungchang leh inkhawm chungchangah kher hi chuan dâwt sawi an ching hle tih hmuhchhuah a ni a. Gallop Poll buatsaihtute pawh hian an finding leh a tak tak ram inthlauh theihzia chu an pha bik awm lo ve. Entirnân America ramah mihring za zela 40 chu inkhawm taima tak tak se kristian an pung viau tur a nih bâkah Sunday ni-ah te pawh inkhawm kal tur an inpel suau suau tur a ni.

Hadaway, Marler, leh Mark Chaves te chuan kum 1993 khan  Ashtabula County, OH-ah protestant kohhran pali leh USA pum puia Roman Catholic bial 18-a inkhawm zât an zir a. An zir chhuah dan chuan public opinion poll-a protestant kohhran inkhawm report za zela 40 chu a tak takah chuan za zel 20 chauh a ni a. Roman Catholic inkhawm report za zela 50 tih pawh a tak takah chuan za zel 28 emaw chauh a ni. Chutah Ashtabula County bika Roman Catholic inkhawm zât chu thla engemaw zât an zir bing leh a. Chawh rualin za zela 24 inkhawm anga chhut theih an ni. Mahse hemi biala Catholic member-te tho chu telephone atangin ‘Tunkâr khan i inkhawm em?’ tiin an interview leh a. Member za zela 51 chuan inkhawm angin an insawi lehtho si – chu chu hming lamna bua kal zât an chhinchhiahna nen a inmil lo nasa hle. A tam zâwkin dawt an sawi niin a lang.

Roman Catholic Kohhran sawi takah chuan a tam ber an ni bawka han sawi zui ta lawk ila. Kum 2003 khân Democrat Party-a Senator lo ni reng tawh thin Catholic pachal David Carlin-a, kum 1989-90 chhova Senate Majority Leader chuan a awmna Roman Catholic kohhran chanchin chu a ziak a. A lehkhabu hming chu The Decline and Fall of the Catholic Church in America tih a ni. Amah hi Catholic ruh tak mai a ni a, a thuziak pawh ka chhiar chinah chuan a changkang khawp mai. He pa thuziak ang hi chuan America ramah an kohhran Catholic chu a tlahniam hle. A bu meuha siam a nih avangin sawi chhawn vek sen a ni lo.

Kenneth C. Jones of St. Louis chuan kum 2002 khan statistics bu, Index of Leading Catholic Indicators: The Church Since Vatican II tih chu a chhuah bawk a. Chutah chuan America rama Catholic kohhran tlâk hniamzia chu tihian a ziak:

• Puithiam (Priests): Kum 1930 leh 1965 inkar khan USA-ah puithiam a letin an pung a, chu chu puithiam 58,000 an ni. Kum 1965 atang khan tla hniam lehin kum 2002-ah chuan puithiam 45,000 chauh an awm tawh a. Kum 2020 –ah chuan puithiam 31,000 chauh an awm tawh ang a, a zahve zet chu kum sawmsarih chung lam an ni ang.
• Puithiam Nemngheh Thar (Ordinations): Kum 1965 khan USA-ah puithiam thar 1,575 nemngheh an ni a.Kum 2002-ah chuan mi thar 450 chauh nemngheh an ni. Kum 1965 khan bishop bial za zela pakhatin puithiam an nei lo va, kum 2002-ah chuan puithiam nei lo bishop bial 3,000 (za zela 15) an awm tawh a ni.
•  
• Seminarians: Kum 1965 khan seminary a zirlai 49,000 an awm a, kum 2002-ah chuan 4,700 chauh an awm tawh a. Chu chu za zela 90-a hniam ang a ni. Kum 1965-a seminary 600 zet awm kha hmun thuma thena hmun hnih khar an ni tawh.
• Sisters: Kum 1965 han nun 180,000 an awm a. Kum 2002 –ah chuan 75,000 chauh an awm tawh a, an kum chawhrual pawh kum 68 a ni. Kum 1965 khan zirtirtu-a thawk nun 104,000 an awm a, kum 2002-ah erawh chuan 8,200 chauh an ni a, za zela 94-in an kiam a ni.
• Religious Orders: Sakhuana lamah pawh America ram Catholic hi an hniam hle. Kum 1965 khan tlangval 3,559-in Jesuit puithiam nih tumin an zir a. Kum 2000-ah chuan 389 chauh an awm tawh a ni. Christian Brothers pâwl phei chu an ral lo chauh a ni. Hmun thuma thena hmun hnihin an kiam a. An seminary-a zir duh phei chu za zela 99-in tlahniam a ni. Kum 1965 khan Christian Brothers-ho seminary-ah zirlai 912 an awm a. Kum 2000-ah chuan pasarih chauh an awm tawh. Franciscan leh Redemptorist puithiam pawh kum 1965-a 3,379 lâi awm kha kum 2000-ah chuan 84 chauh an awm tawh a ni.
• Catholic schools: Kum 1965 atang khan USA-a Catholic high schools zahve deuhthaw khar an ni tawh a. Zirlai pawh 700,000 atangin 386,000-ah an tla thla a. Sikul hniam lam phei chuan tuar tak an ni. Sikul 4,000 zet khar a ni a. Zirlai pawh maktaduaih 4.5 atangin maktaduaih hnihah a tla a ni. Catholic News Service, April 16, 2007 report-a a lan dan pawhin an tlahniam hle tih a lang.

Kum 1965 atang khan USA-a Catholic-te chu maktaduaih 20 zetin an pung a. Hei hi Latin America atanga pêm lût an tam vang a ni pakhat. Mahse an rinna chungchangah erawh chuan an chhuanawm bik loh khawp mai. A number lamah pung reng angin lang mah se sakhuana la thutak lo an tam sawt hle tih a lang chiang viau a ni.

  

• Catholic Innei: Catholic inneihna dan hmanga innei pawh an tlêm sâwt em em bawk.
• Attendance at Mass: Kum 1958 Gallup Poll report dan chuan Catholic pali zela pathum chuan Sunday-ah inkhawm ziahin an insawi a. Mahse tunhnaia University of Notre Dame-in an zirchianna-ah chuan mi pali zela pakhat chauh an inkhawm peih tawh a ni.
• An lay religious teacher zinga za zela 90 chuanin nau pai thei lo tura insiam chungchanga an kohhran zirtirna chu an pawm thei lo va. Za zela 53 chuan nau titla chungin Catholic tha tak la nih theih thovah an ngai bawk. Za zela 65 chuan Catholic-te chuan an kawppuite thenin midang an nei leh thei tur a ni tih ngaihdan an pawm a. Za zela 77 chuan Sunday nia inkhawm kher lo pawhin Catholic tha tak a nih theih tho an ti.

 

Catholic Kohhran lamah kan han pêng thui ta deuh a. A tam ber an nih avanga han sawi mai kan ni. Tunah chuan opinion poll lamah khan kal leh tawh ila.

Kum 1993 khan Jay Demerath of the University of Massachusetts chuan poll result leh a tak tak inthlau lutuk chu  "Gallup and other pollsters are aware of this. It’s kind of a dirty little secret,’ a ti hial reng a ni.

Opinion poll buatsaihtute hi an fing khawp a. ‘Tunkâr ni sarih chhung khan eng nge i tih?” tia zawhna an han zawh kual chuan inkhâwm zât hi a hniam daih a. Mahse chu mite vêk chu “Tun chawlhni kal ta khân i inkhawm em?” tia an an zawh leh chuan inkhâwm zât percent chu a sâng leh daih lawi si. Hetiang hian a zawhna azirin inkhawm zât hi a danglam duai duai thei a ni.

Hetiang hi sawi peih chuan chu mite zir dan pawh, chumi chanchinbu-ah  pawh tichuan a inziak tih ang reng sawi tur a tam khawp mai. Sawi vek pawh a tul lo ve. Kan sawi chin atang ringawt pawh hian a chiang viau a ni.

America rama i kal chuan helaia kristian tha tak kha i nih avangin i inkhawm ngei ang a. Sâp patling chal ngalh pui pui an lo thu ngir khup ang a, nula leh tlangval hmeltha tak tak an che vel suau suau bawk ang a. Chutah inkhawmpui han chhim phei la chu he laia sâp sang tam hmu ngai lo khan sap hmêltha tak tak lo thu ngir khup chu i hmu ang a. An che vel an zei bakah helai vela thil changkang hmuhtur tam si lo nen, hmuhnawm thlirin i thlir ang a, America chu i hmu kristian viau maithei a ni. Helaia i awmna kohhran a têt poh leh i zu hmu ropui mai ang. Kohhran dang inkhawmpui emaw, an biak in leh an thiltihdan hrim hrim thlir miah lova, khu laia nangmah lo buaipuituten i awmna kohhran hlir an lo hmuhtir phei che chuan (eng kohhran pawh ni la) kohhran ropui ber hmuhin i zu inhmu hial maithei a ni. I rawn haw hunah i sapram kal chanchin i han sawi ang a. Thusawi uar thiam mi i nih phei chuan i thusawi ngaithlatute chuan America chu kristian tha tak tak hlir awmna emaw an ti ang a, chung kristian tha tak tak zingah pawh chuan i awmna kohhran chu a ropui ber emaw an tihial maithei bawk.

Hetiang hi ram hnufual atanga kristian rilru pua Sapram (America chauh ni lo) fang thinte thu hawn dan leh an thusawi ngaihthlatute ngaihthlâk dan ni fo thei a ni. Rock music concert chhim tura kal ni la sap thalaiho tal bawrawzia leh an sakhawmi lohzia hmuin i thil hmuh dan a danglam viau thei bawk. Pastor inkhawmpui zu chhim thu hawn leh i thu hawn chu a inang lo viau ang a. Mitdel sai hmu ang maiin America in hmuh dan pawh a danglam daih ang.

 

2. Chanchin Lawmawm Lam

Khawthlang lama chanchin tha lo lam kan an sawi hmasa a. Khang chanchin kan hriat avang khan lungngaih tur a ni lo. Philip Jenkins, History and Religious Studies, Pennsylvania State University-a zirtirtu lar tak chuan tihian a ti: “Sakhaw thil ni lo heng communism te, feminism te leh environment-te hian kan rilru tam zâwk a luah a. Ram rethei Africa, Asia leh Latin America lama kristian pun dan hian khawthlang lam mite rilru a luah pha lo mai mai a ni,” tiin.

Khawthlang lamho khu tunhma chuan an inti kristian ram deuh bik thin a. Mahse tun kum sawmhnih kal ta vel atang khan thil awm dan a danglam tan ta. Nakin lawkah chuan kristian tam zawk chu heng ram thanglai amite hi an la ni ang.

Tunhma lama kristian awm theihna tura ruat mang loh Nepal ramah te pawh kristian an pung chak khawp mai. Kum 1960 khan Nepal ramah kristian 25 an awm a. Tunah chuan maktaduaih khat an tling thuak tawh a ni. Tihduhdahna leh harsatna tam tak karah Nepal ram kohhrante chu an thang zel a. Kohhran thar a ding reng bawk. Sakhaw dang aiin a lêt hnihin kristian an pung chak zâwk.

           

A. China

 

China chu communist ram, rawngbawl hleih theih lohna ram a ni a. Chuti chung chuan kristian an pung chak hle. Kum 1970 khan kristian maktaduaih khat leh a chanve an awm a. Kum 1990 khan maktaduaih 64-ah an kai chho va, tunlai hian maktaduaih 90 tling tawhin an inring a. Kum 25 chhungin maktaduaih 120 kai hman an inring. A sawi uar deuh phei chuan rei vak lovah China khi khawvela kristian tam berna ram ni dawn ngeiin an hria a ni.

Amarawhchu China ramah chuan kristian tam tak tan inthup deuhte a la ngaih avangin inchhiar dik a harsa a. Sawrkar lam phei chuan an chhût tlêm thei khawp mai. Kristian lam kan inchhût thâu deuh a. Tin, kristian zingah pawh uar deuh hlaiha chhût an awm ve a, chuvang ngaihdan siam a harsa khawp mai. China Daily-in (December 26, 2009) a report dan chuan kum 2008 tâwp lam khan China ramah protestant ringawt pawh maktaduaih 70 an tling tawh a ni.

Communist hruaitu hlui pakhat, tunhnua kristian lo ni ta ZHAO XIAO-a phei chuan tunah hian China rama kristian-te chu maktaduaih 130 tling tawh ngeiin a ring a. Pew Forum on Religion and Public Life, America pawhin a rûka kristian tamzia chu ha hipin an sawi ve bawk a. China Aid Association (CAA), Texas pawhin ngun taka China ram an zirin kum 2008 khan kristian maktaduaih 130 awm tawh ngeiin an ring a ni.

 

B. South Korea Lamah

Tunhma, kum 1950 hma lam kha chuan Korean Peninsula-a kristian tam zâwk chu tuna N.Korea lama awm an ni a. Communist a lo len khan kristian tam zâwk chu S.Korea-ah an pêm a. N.Korea lamah kristian eng zât nge awm hriat theih a ni lo. Chuvangin S.Korea lam chauh kan thlur ang. Chu pawh chipchiar lutuk lovin.

S.Korea-ah khian mihring maktaduaih 45 vel an awm a. Chung zinga maktaduaih14 dâwn lai chu kristian an ni. Kristian zingah protestant maktaduaih 8.6 an awm a, kohhran mal khaia lian ber Catholic maktaduaih 5.1 an awm bawk. Korea-a  kristianna pu lût hmasatu chu Joseon dynasty hun, kum zabi 18-na lâia mi Yi Sung-hun a ni. A hun laia lal chuan a haw hle; kristiante chu a tiduhdah a. A hnua lalte pawhin tiduhdah zelin kum 1864 phei chuan Catholic mi 8,000 lâi tihhlum an ni a. Heng zingah hian French missioanry pakua lâi an tel nghe nghe.  

S.Korea kohhrante chu an phur a, an hlim bwk a. A than pawh an thang chak hle. Khawvel hmun dang ang lo takin Catholic pawh a thang chak a. Kum sawm chhungin a lêt deuhthawin an thang hman a ni. Khawvela kohhran lian zual, biak in pakhata lâwi 12 zinga 11 chu S.Korea rama awm niin an sawi.

Khawvela kohhran biak in pakhata lâwi zinga lian ber Yoido Full Gospel Church, Seoul chuan member 750,000 chuang a nei a. Sunday apiangin mi nuaih hnih vel zela inchhawkin inkhawm vawi sarih an nei thin. An inkhawm tamzia leh ropuizia sawitute chuan football khel en nen an tehkhin deuh ber. Tin, S.Korea hian USA tih lovah missionary a thawn chhuak hnem ber bawk.

Vietnam ram lam han hawi ila. Sawrkar chuan an ramah kristian 800,000 vel awma an sawi lâiin kohhran lam chuan maktaduaih khat chuang fê niin an insawi thung. Engpawhnise an ram mihring za zela pariat chu kristian an ni a. Catholic an tam lawrlak a. Sawrkar nen pawh an indawr nasa ber. Zawi zawiin an thang zel a. A bikin chhim lam thalai zingah hma an sawn nasa bika sawi a ni.

Indonesia chu khawvela Muslim tam berna ram a ni a. Central Statistics Bureau and Statistics chhut danin  kum 2006 khan mihring maktaduaih 222 an awm a. Chung zinga za zela 5.85 chu kristian protestant niin za zela pathum chu Catholic an ni. Rawngbawl a harsa hle naa kristianin pun lam an pan hret hret a. Thil lawmawm lam a ni.

Phillipines-ah mihring maktaduaih 92 vel an awm a. A ram mihring za zela 90 kristian, za zela panga Muslim niin a ram mihring za zela 83 (maktaduaih 73.8) Catholic an ni a. Brazil leh Mexico tih lohvah chuan khawvela Catholic tamna ber an ni. Kohhran pâwl dang, Catholic han el pha sawi tham an awm meuh lo. Kristian ram an nih avang leh Catholic tamna ram a nih avangin sawi thui lo law law mai ila.

Japan ramah kum 2008 khan mihring maktaduaih 127,704,000  an awm a. Tlêm lam an pan. A mihring za zela 0.5 chauh kristian an ni. Catholic chuan member 509,000 neiin an insawi a. Eastern Orthodox-in 30,000 vel niin an insawi bawk. Tokyo-ah ringawt khian kohhran sangthum vel an awm. Japan ramah khian kristian chu tlêm tê mah nise kristian culture chuan a chiah hneh hle lawi si. Chrismas-te chu bazar ni pui berah an nei a. Kristian inneih dan leh inchei dan a lar em em bawk a. Mahse chuti chung chuan kohhran pâwl hrang hrang an tam avang leh kritian sakhaw zirtirna leh Japanese sakhaw lo vawn tawhsa Shintoism leh Buddhism idealogy te chu ril tak maia a inkalh tlat avangin kristianna hian hma a sawn hlei thei lo va, thenkhat sawi dan phei chuan a tlahniam zâwk a ni.

 

 

C. Africa Khawmualpui Lamah

Africa khawmualpui khu a sakhuana zawng chuan hmun hnihah then theih a ni. A hmar lam Arab tamna lam chu Islam sakhaw zuitu an ni ber a. A khawmualpui laili leh chhim lamah kristian an tam thung. Hmanlai sakhaw be mi an la tam hle a. Kristian inti, hmanlai sakhua la be tho mi engemaw zat an la awm bawk.

Africa khu khawvela kristian pun chakna ber ti ila kan daw lo vang. Center for Applied Research, Apostolate at Georgetown University chhut danin Africa-ah khuan kristian maktaduaih 447 vel an awm a. Kum 1900 leh 2000 inkar khan Africa khawmualpuia Catholic member chu za zela 6,708 (a lêt 6,708 tihna ni lovin), maktaduaih 1.9 million atanga maktaduaih 130-ah an pung chho va. Tunah hian kum tin za zela 2.4 –a pung ang an ni.

Internet website pakhatin a tarlan dan chuan darkar tin Muslim 667 kristianah an inpe a, ni tin 16,000, kum khatah maktaduaih ruk ang vel kristianah an inpe a ti a. Maktaduaih ruk hi a la tlem mah mah maithei a la tizui. =henkhat chuan thil hi an sawi uar ve a. Awih chin tawk neih erawh a tha. Tun anga an pun chhoh zel chuan kum 2000 atanga kum 2025 inkar hian maktaduaih 200 dangin kristian sakhua hi la rawn zawm belhin an ring hial a ni.

Bishop Michael Coleman, vice-president of the Roman Catholic Bishops' Conference of Southern Africa-in London Telegraph a hrilh dan chuan, "We are seeing a shift from a Eurocentric base for the Christian churches to a more worldwide base, including Africa and South America," tih a ni. Letling buai lo mai teh ang.

Europe kristiante khu kum 20 lo la awm turah chuan maktaduaih 17 vela an kiam rin a ni a. Hei hi inkhawm peih an tar tawh hlawm em avang leh thalai lamin sakhuana an ngaihsak loh em vang a ni. Europe kristian maktaduaih 531 zinga za zela sawm chauh an inkhawm peih laiin Africa laman an pung nasa a. Europe lam an vei let tan tawh hial zawk a ni.

Christianaggresion.org-in a tarlan dan phei chuan kum tin Africa mihring za zela 3.5 kristianah an inlet a, chu chu maktaduaih ruk vel a ni. An sawi uar deuh a nih pawhin a tam thawkhat tih chu hairual a ni lo.

Africa khawmualpuia ram zim tê Benin ang te pawh an rethei hle chungin kristian rawngbawlna a kal tha a, kum tin kristiana inpe thar mi 120,000 an awm a ni. A ram mihring za zela 24 chuang hret Muslim an ni ve a. Hmanlai sakhaw bemi an la tam hle bawk a. Chuti chung chuan kristian an pung chak hle.

 

D. A Tlângkawmna

Kan thil ziah hi chul ram fan ang thuak a nia, sawi hmaih kan ngah khawp mai. Khawvel changkang zelah mi kan inhre chiangin kan intlawh pawh nasa tial tial a, sakhua zawng pawhin kan inpawlh nasa tial tial bawk. Tunhma kristian rama ngaih mingo ramah sakhaw dangin kua a hreuh thuk tial tial a. Kristian ram ni ngai lo, ni thei tur pawha ngaih loh ram thenkhatah kristian an pung chak em em thung a. Hetianga thil a kal zel a nih chuan tun atanga kum sawmnga velah chuan kristian ram kan tihte hi a inletling thawk ang a, tunhmaa missionary tir chhuak thinte ramah khan missionary kan la tir lût vethung dawn niin a lang.

Christianaggresion.org vêkin a tarlan danin kum tin missionary chawm nan leh a kaihhnawih atan US dollar tluklehdingawn 145 sen ral a ni a. Chu chu a thlawn lo vang tih ring ang u. Entirnan India ramah pawh hian second 17.28 chhûngin kristianah mi pakhat inpe zel ang a ni a. Ni tin mi 5,000 tihna ang vel a ni.

He website vêk hian tihian a ti.

 

Christian Population Statistics

 

China:
1950 - 1 Million 2003 - 100 Million

South Korea:
1945 - 2.2% Population 2003 – 49% Population

Papa New Guinea:
1950 - < 1% Population 2003 - 97% Population

Africa:
1900 – 1.7% Population 2003 - 55% Population

 

Tun hmaa kristian ram ni ngai lo, tun hnua kristian ram ni tate chu: -

 

Angola - 90% Christian
Burundi - 78% Christian
Cameroon - 35% Christian
Central African Republic - 82% Christian
Chad - 33% Christian
Congo - 62% Christian
East Timor - 92% Christian
Ethiopia - 52% Christian
Equatorial Guinea - 94% Christian
Gabon - 79% Christian
Kenya - 25% Christian
Liberia - 68% Christian
Mozambique - 31% Christian
Nigeria - 52% Christian
Papa New Guinea - 97% Christian
Philippines - 84% Christian
Rwanda - 69% Christian
South Africa - 78% Christian
South Korea - 49% Christian
Sudan - 30% Christian
Tanzania - 20% Christian
Togo - 23% Christian
Uganda - 70% Christian
Zaire - 90% Christian

 

A chunga mi ang khian kristian-te chu ram rethei leh ram thanglaiah kan pung nasa em em mai a. Hei hi thil lawmawm tak a ni.

Kristian zingah Penticostal an thang chak filawr (uar deuh hlaihin han tichiam ila) viau mai. Hei hian eng tiang chiahin nge kristian khawvel hi a her pui dâwn hriat a châkawm khawp mai. Ka hre der si lo. Penticostal kan tih hian kohhran mal sawina a ni lo tih hriat a tur a ni. Penticostal movement-ah hian thurin inang lo tak tak, englaimaha kohhran khata lawiho thei lo tur an tam mai.

Engpawhnise tunhma kum sawmnga kal taa kristian khawvel leh tunlai kristian khawvel hi chu danglam tak a ni a. Kum za dang dam thei ila, tun atanga kum 70-80 chho vela kristian khawvel awm dan tur hi hriat a châkawm khawp mai.