Karl Marx-a Dialectic Materialism Kaihlek leh Conflict Theory

Karl Marx-a chanchin leh a zirtirnate kha thenkhat chuan ṭhenawmte chanchin aiin kan hrechiang zawk awm e. Chuvangin a zirtirna pakhat dialectic metarialism zulzui hian ka duh duh ka’n sawi kual vel mai mai teh ang; zalên taka mahni duh zâwng zâwng han hawl kual vel hi democracy boruak (zalenna) hip manah nuam deuh asin!

Karl Marx-a dialectic materialism kan tih hi ama sawi chhuah hmasak chiah pawh a ni lo nghe nghe a. Mahse amah hi a sawi chhuaktute zingah a lar ber si a, a sawiah kan puh ta mai lo thei lo a ni. Kum 1848 aṭanga kum 1887 inkar khan Karl Marx-a nena lehkha an inthawn tawn velna-ah he ṭawngkam hi socialist Joseph Dietzgen-an a hmang hmasa a. Amah Marx-a phei hi chuan a lehkhabu-ah pawh a ziak lang miah lo zâwk. Chuti chung chuan Karl Marx-a Dialectic Materialism kan ti tho tho vang.  

 He dialectic materialism hi Marx-a te, Joseph Dietzgen-a te leh Friedrich Engels-a te hrilhfiah ang diak diak chuan ka zui dawn lo (an hming ka han lam ri ve mai mai te pawh a ni mahna); keima hrilhfiah danin ka phul pui ve mai mai dâwn a ni.

 A hun chiah ka hre ta lo; kum 1993-95 bâwr vel a ni awm e (Tuilêt hnu a ni tih ka chiang); Congress sawrkara Pu J. Lalsangzuala, Finance Minister a nih lâi kha a ni. Vawikhat chu Shillong-ah sawrkar hna pawimawh thawk turin a kal a. Chutihlaia Shillong Mizo zirlai mifing rual, kei ka ni inti ṭhah, tum se IAS te pawh ni ve thei tur leh ram hmangaih vanga vawi 13 thih ngam ṭhiau tur chuan Mizoram House a chhuahsan tur chu an lo dang a. Mizoram sawrkar an sitna thu leh an duhtâwk loh dan an lo hrilh a. Ani pawh chuan kal luih a tum bik lo. ‘Nakinah in la hrethiam ve mai ang,’ a ti a. A nui suk duh chauh e an ti.

Chutih laia zirlai mifing rual zinga pakhat chuan “Mizoram kan haw chho va, sawrkar hnate kan han thawk chu lehkha kan zirlaia kan sit em em Mizoram sawrkar officer lian leh politician-te ang tho chu kan han ni ve ta der mai a. A ṭhenah phei chuan kan lo tluk awzawng lo chu niin. Kan lehkha zir lâia kan duhthusam suangtuahna ringawt kha chu a tak tak ramah chuan a lo ni awzawng lo. Pu J. Lalsângzuala’n ‘In la hrethiam ve mai ang,’ tia a nui suk a, min hnial duh lem lo kha ka hrethiam ta,” a ti.
 

College-te kan kal a, lehkhabute kan chhiar a, saptawng chanchinbu hrang hrang, kan naupan laia kan vênga kan hmuh phâk loh, tun thlenga kan vêngte chuan an la hmu pha lo tih kan hriat headlines tlêma zâwng kan han bih kual thuak thuak a. Hostel-ah thianhovin duhthu kan han sam leh a. College magazine-ah mi sap tawng tha entawn ru zeuh zeuh chungin English section-ah ngei mai thu kan han chhuah ve a. Sâptawngin eng engemaw kan han sawi chhuak thiam ve ta bawk a (Sâpho chuan anmahni leh anmahni an inbiakna tawngkam pangngai, sap tawng ki accent diktaka biak tlâkah min la ngai chuang lo tih pawh kan inhre pha chuang lo).  Miin min han fak der zauh zauh bawk nen. Min fak dertu thenkhatin min fakna chhan chu an lamtanga min siam an duh vang mai mai te, rorel lai/hotu ding lai sawiselna hmanrua atana min hman an duh vang mai mai te a ni tih hre lovin tak tak emaw kan ti a. Fing ta viau leh fel ta viaua inhriat a awl a. Mi tâna ngeiawm khawpin kan thawveng tih inhriat a har khawp mai.

Hetihlai tak hi a inveng thiam lo chuan an mualpho pui a. Mi rilru an hliam a, an damchhunga an siamthat zawh tawh loh tur thil an ti chawk.

Nia, khawvelah hian hrânghlui leh ṭhangthar inkârah conflict a awm fo ṭhin. Naupang kum sawmhnih hnuai lamin tunlai hla an han tiri bur bur mai chu khawhar hla leh a nêm lam ngaina tawh nu leh pate tân chuan chhepchher inkhawng ri tluk lek a ni a. Tichuan nu leh pate leh fate inkârah conflict a lo awm ta thin a ni.

Tlangval sam tiphir duh leh chutiang sakuh hmul niawm tak ngaina ve pha lo nu leh pate inkârah conflict a awm thei. Kan sawi zel ang.

Kohhranah meuh pawh hian conflict hi a lo awm thei khawp mai. Thangthar lehkhathiam rual, saptawng intithiam, intichhiar zau (ka tawngkam hman hi nalh chu ka tichiah lo khawp mai) leh puitling, kohhran hna lo thawk rei zawk tawhte inkarah pawh conflict a awm ṭhin. Hlawh tihpun dan hriaa inhria ṭhalai naupang zâwk leh rei tak lo thawk tawh, tihdan thar hre tawh si lo hotute inkarah pawh inhnialna lian tak a chhuak thei.

A nih loh pawhin thangthar lehkha chhiar zau zâwkte hriat dan leh hmuh dan kha a zir chhuak hmasate hmuh dan nen a inang lo thei a, chutiangah chuan college khata kal theuh theuh pawh a inan loh theih khawp mai. Kum sawmte a han ral hi chuan college leh university-ah syllabus thar, ngaihdan thar, zirtirtu thar, lehkhabu thar tam tak a lo awm hman a, a zir hnuhnung leh a zir hmasate thil thlir dan leh pawm dante pawh a danglam daih thei. 

Karl Marx-a chuan a hun laia British economic system chu thesis a vuah a. Chu system dotute chu anti-thesis a vuah thung. Chu thesis awm mek capitalism chu mirethei rahbehna hmanrua mai a ni a ti. Mi hausa an hausa tawlh tawlh a, a retheite an rethei tawlh tawlh a. Nakinah chuan mi retheite chu an la hel ang a, capitalism chu an paih ang a, hausa bik leh rethei bik awm tawh lohna communism a lo ding ang. Communism-ah chuan mi tinin an chanvo theuh an hmu ang a, hausa leh rethei bik awm lovin mi tin an inang tlang vek tawh ang. Chumi hunah chuan communism chu thesis a lo ni ve thung tawh ang a ti (Kan han sawifiah thiam lo khawp lehnghal). Tichuan thesis leh anti-thesis indona-ah chuan anti-thesis a chak a. Amarawhchu hmana anti-thesis, tuna thesis lo ni ta ngei pawh chu anti-thesis dang an lo chhuak ang a, chu chuan a la rawn luahlan ve leh ang.

 

 Nia, kum sawmhnihte a han ral meuh hi chuan thil hi a lo danglam nasa hman khawp mai. Hmana college naupang fing pui pui, hostel kawt thingbuk hnuai (emaw hnuai lo emaw) remchang lâia titi fing tak tak vawr a, hlawh pun dan hre em em te, chak zâwka rawngbawl dan tur hre riau mai te, zirna lam kawnga hotute sit em em mai te, development kawng hrang hrang hre em em te, foreign ram aṭanga sum lâkluh dan hre riauva inhria te, hotu ding laite aia zirna siam ṭhat dan kawng hre thûk  zâwk riauva inhria te, ramthim sut en dan hre riau te, hotute sâpṭawng thiam lohzia sawi nuam tiriau mai  te khan a fawng an chelh ve ṭan ta. Hmana anti-thesis kha tunah chuan thesis an lo ni ve ta a nih chu.

Amarawhchu mi tam zâwk chuan anti-thesis an nih lâia ṭha an tih, tih mai awma an hriat tam tak chu thesis an lo nih ve tâk hnu chuan an ti duh chuang lo; anti-thesis an nih lâia hotute sawisel nan, tihmualpho nân, mahni intihlâr nan an ti ve mai mai a ni. Chu chu hre thiam lovin keini ang mi mawl deuh chuan chutianga anti-thesis huangtau deuh leh thawm nei ring deuh, hotute rel nuam ti deuh thu chu kan zawm a, kan mawngah an hiat a, hotute kan tawng kan tawng a, a tâwpa a hlâwkna têltu leh a rah sengtu chu midang daih an ni.

 Hei hi Mizoram pawlitik-ah hian a chiang khawp mai. MNF sawrkar lâia contractor hnen atanga an contract estimate atanga za zela pathum an khawn kha Congress hian ti ve ta se an duh hauh lo vang. Opposition party, anti-thesis an nih lâia an huat em em corruption leh hlemhletna eng engemawte kha thesis an han nih ve chuan an lo duh ve huam huam khawp mai.

Tin, ka hmuh dan chuan khawvel politics leh social change-ah hian anti-thesis an nih lâia che nasa apiang khan thesis an lo nih ve khân anmahni eptu anti-thesis te kha an ngaithei lovin an beilêt nasa zel. Mahse hei hi ka rinthu, keima observation ve mai a ni a. Pahnih leh pahnih belh pali tih anga dik zawng a ni thei lo mai thei.