KA THIH NI

(Fiamthu - Chawngkhum Dan Tlâng Huat Loh)

 

Tui thiam tuiah an thi a, thing thiam thingah an thi a, sipai huaisen indona-ah an thi. Kei, thing thiam lo, tui thiam bawk si lo, sipai huaisen anga pasaltha thiha thi ve ngawt thei si lo chu tar kûn khûp biha ka dam hnu-ah chanchin thar tingaihnawm chuang miah lo leh ram kalsiam tidanglam miah lovin khum laizawlah ka thi ta thut mai a. Tichuan ka thihchhan sawi tur mumal an hriat loh avanga an buai nak hnu-ah ka chhungte chuan eng tin tin emaw ni mi zawhna titam tur tingin mitthi chanchin ziahna chu an ziak khat ve hram a. Kan vêngah chuan min uitu aiin hun min tihpuitu an tam tawh zâwk lehnghal!

Tar thiha min han thihtir tâk hnu chuan min han tah ve laih laih a. Thusawitu apiang lah chuan la dam se min tih thu aiin chu chen ka dam thei min lawmpui thu leh nat lâwk em em pawh awm lova ka thi ta mai vannei min tihzia chu an sawi tam zâwk a. Thih pawh hreh tawh lo viau ang hiala min sawite pawh zu awm a!

Kan nu lah chu a upa zâwk e ti lovin a la hrisel zaw phian a. Mahse taksa lam hrisel phian e tilo chuan a lo tar ve ta bawk a, chutihlâia a dinhmun ringawt hmu tân chuan Helen Lowry sikul hotu ber te pawh a lo ni ve tawh thin tih leh a vanglâi chuan nula harh vang tak a lo ni ve tawh thin tihte chu awih harsa tak a ni. Pasal sun avanga lungchhiat nachang em em pawh hre lo khawpin a dam rei a. A tu leh fate pawhin be chhawhchhi ni si lo hian fiamthu thawh nân an hmang a, an nuih pui tlawrh tlawrh thin. Ka ruang bulah chuan a tute hovin an rawn kai phei a, a vanglaia thihsan ni ila a tah nasat dâwn tehreng nen; tunah zawng vawihnih khat a han ngik ve faih faih tih loh chu a meng fiah vei kâk a. Sawi tur lah chu a hre lo em em lehnghal.

Ka thih ve meuh chuan Aizawl lama ka hmêlhriat thenkhatte chu an thi zo a ni tawh a. Rawn kal tur pawh an awm tawh mang lo. Ka tlangval chhoh tantirha ka biakrawn thin, ka manganna ka hrilh ngam Pu S.Lalkamlova te nupa thlan chu Zotlang thlanmual hluiah tuma ngaihsak hlawh lovin a chul rap tawh a. Christmas leh kumthar vuak vêta a tu leh faten lehkha-chehmawi leh baloon tlêm têa an va chei veleh zauh bâk chu tlawhtu pawh an awm tawh meuh lo. Ka thih ve meuh chuan Vaivakawn pawhin thlanmual thar an nei daih tawh a. Thlanmual hlui kil sir khat hmun rem si, mi tlawh mang loh lâia Pu H.Lalzidinga te nupa thlan erawh chu Zotlâng thlanmual hluia Pu S.Lalkâmlova te nupa thlân âi chuan a la thar deuh a. Amarawhchu thlanmual hlui zâwka inphûm ngang an nih avangin a hnim hle mai a. YMA pawhin an sam zen zen peih tawh loh avangin hnimin a bawh deuh reng a ni. An nu Pi Partei pawh a vannei e, Tiddim-ah khân la awm se zawng, Khûpa te vêng thlanmual kil khata

PHUNTU: A PASAL – CHINZAPAU. A Fanu: Niangi 

 tihte emaw kha a thlanlunga inziak tur a ni a. Mahse tunah chuan a pa fin leh fel azârah Vaivakawn thlanmual thalai ngat a chang pha a nih hi.

An that vanglaia an thian tha, khawtlânga an rawngbawlpuite takngial pawhin an nupa hming chu an lam ri ngai ta lo ti ila lam ri tur an awm tawh mang lo a ni zâwk. An sitting room tukverh bula an nupa thlalâk intârte chuan a kum telin en a hlawh khât tial tial a. An bang rawng an hnawih that hunah phei chuan rilru natna em em nei lovin a langsar lo laiah chuan thuhrûk em aiah an tar vel mai mai tawh ang. Thahnemngâi taka an lo din ve an inah chuan an hming a ri tlêm tial tial a, an thlalâk pawhin a chang kil sâwt khawp mai.

U DINGA kha chu mi thil chik mi leh zir peih mi a ni bawk a, kan bengvar phah thin ngawt nia. Chhura Sekibuhchhuak chhe tawh a kawl that kan en laih laih lai te kha ka thih hma lawk te khan ka la theihnghilh lo va. Mualzavata chem hman hlui, tuiêk bur tawh pawh an khum hnuaiah a dah reng thin. Samdala lawh peih loh theipui min han lawh pui lai te kha a ngaihawm ngawt thin nia. Chhura lawh theih tâk loh chengkek awmna pawh a hria a, a rah hminte pawh min eitir ve a. A kung tak erawh chu kan han hmuh pui ve ta chiah lo. Chemtâtrawta chem tahna lung a kawl lai khan chem han tah ve chhin reng reng kha kan chak thei hle a, mahse kan tât ta chiah lo a ni awm e. Mary Winchester-i te pafa thlalâk, color ngei mai kha a album-ah khan a târ dul mai a. Hmuhnawm kan tithei hle a ni. Vawikhat chu a vairam kal haw khan Amitabh Bachchan-a pheikhawk bun hlui leh Dharmendra kekawr bul hâk hlui a rawn hawn a, kan ngaisang teh asin.

Pu NILAWMA thlan chu a nupui hmasa zâwk thlan atanga hlam sawmhnih velah chuan a ding vâr vau a. Ani zawng a vannei a, a thlan tlawh peih deuh mai nupui a neih leh azârah a thlan chu a fai hliau reng a. Tin, thlanmual step bula awm a ni a. A awmna lâi a lo fuh kher bawk nen, mahni chhûngte thlan tlawha kal leh mitthi vuia thlanmual tlawh apiang deuh thawin kalpahin a thlana thu inziakte chu an chhiar thei a, a damlaia amah hre lo pawhin an hriat phah fur zâwk a ni. Chuvangin thih hnua lar duh chuan kawng bula inphumtir a tha.

Pu Nilawma hnung zui hian Phawngpui tlâng te saw kan lo lâwn chhuak ve tawh a. Chanchin sawi tur a ngah khawp mai. Ani zawng a thiante ang lo takin a ngaihzawng hmasa ber nupuiah neiin khawvel pâr mâwina te hi chul hnâp khawpin a lo chenpui tawh a; a vannei khawp mai. A rawn tleirawl chhuak kha foreigner ni awm tak hian a vun rawngte kha a danglam a, chu vang chu emaw ni, an khaw nulaho chu a ngaihsak vak lo. Chutiang taka tlangval nungchang tha, in chhunga awm mual mual thin chuan Lunglei Zohnuaiah khawvela a pangpar mâwi tihber chu a va tawng ta a. Chutiang thil la tawng ngai lo tlangval hnah khat, tu pawi mah sawi ngâi lo, sakhi pachal ram tla ang zan zanin a duhber a hmu chu lal ngai lo lal a tina ngei mai.

Khaw chhiat zan leh khaw that zan, thla en zan leh en loh zan inang pâta Zohnuai kawng zawhin fur leh thâl a hmang tluan a. Chu hmangaihna kuhmum lo pâr chhuak chu sul rûl leh ngêtin a tihmêlhem ang tih hlauvin tlang rel leh thang a dawn hman lo. Zohnuai ui mi bauh hrât bera an sawi pawhin a bauh peih tawh lo thlenga a len hnu-ah an insual chhuak ta a nih kha. Mahse chungte chu tunah chuan history an ni tawh a, tuman an hre reng tawh lo. An hun lâia kawng chhe zim tê-ah te khan car nalh tak tak an tlan fo tawh a. Miss Ziri a rim haw lam Serkawn bawng pachal zanlaia haw chho turin kawng thlanga a sik lumna kangthai hmunah te khan tunah chuan in tha pui pui an ding khup tawh a ni.

“Pi Ziri zawng, hrisel lo reng rengin a damlai hun a hmang a, a khawngaih thlâk e. Hetia a kal ta pawh hi uihawm viau mah se amah tân pawh a tha zâwk,” titu tam zâwk pawh kha tunah chuan hmuh tur an awm tawh bik lo va. A fate zawng zawng khaw dangah an awm si a. Nikum hmasa lama a thlan an chei that leh bâk kha chu tlawhtu hmu lovin a reh tlawk tlawk a ni ber.

PA HRIATA te nupa erawh chu an chemchhe tlo phian a. A hna atanga a chawlh hnu-ah an nu hreh chung chung chu Darzo lamah ‘Huan neih ka tui e’ tiin a kir pui leh a. Mahse a faten Darzo chu nuam titawh hek lo, Aizawl lamah driver hna tal a awm takin an ti a, an awm bosan vek a, an nupain Dârzo khua-ah an awm ve rak rak a. Tar harh vang tak, chhiatni thatnia kal peih tak a nih avangin an khua-ah chuan mi hriat a hlawh zêk a. A beng dâr vuah tha nauh nauh paha an vanglai chanchin a sawi chu khawhar ina mi ngaihthlâk nuam tihber pâwl a ni. Ka thih tûk erawh hi chuan a lo upa ve ta bawk a, a biak tlâk vak tawh lo va. A biak tlâk zâwk a nupui Sangtei lah chu ka hritlâng e tiin an khum kilah chuan alsasian uipui tia lek hian a mu hlawm vei tel a. Tara lamah thikthu te a han tichhe thar leh vel nen, khum atang chuan an pa tawng hre thei lo lutuk chu khuh bar bar chungin a lo hau ve hlak hlak a.

Tunhma lama a lâwm nute chanchin sawi nuam a tilutuk leh sawi tur a ngah lutuk chu tara lama an nupa intihtauh tamna chhan ber a ni. A insawi danin Tuipui atang khuan S.Vanlaiphai nula hmeltha deuh mai ke nâ chu Darzo thlengin a paw chho a ni awm e. Midang puak a duh si lo va, hah pawh sawi lovin amahin a paw chho ngar ngar mai a ni. Vawikhat phei chu Hnahthial nula pahnih haw ngam lovin a peih mang lo chung an inhruaitir a, an kal muang si a, Darzo chul thlâmah te chuan an riak ho ta nawk nawk niawm tak a ni. Tuipui pelh hnu kawng chho-ahte sâwn an vangvat hlau chuan thui fê fêin an mal note chu an hlim khum thin a, mahse Sangtei bula a sawi danin a lâksak tha duh vak lo.

Tin, Tuipui li thûk laia nula tuitla a chhanna lamah a thi thelh a, a thla hual nan a nula pa chuan sial talh a tum a, mahse tul a ti lo. A tlangval lâi khan vawikhat chu amah avangin fanu nula nei ve ve Darzo pa pahnih chu khawhar inah an inhau vak mai a. Chumi tum chuan amah pawh a zak ve deuh a, Lunglei lamah a zin bosan a ni awm e. A hrim hrimin hemi thu lovah pawh Darzo tlangvalho chuan rei tâwk tak zin bo se, a zin bo hlana rilru muanga nula rim vete pawh an châk a ni an ti.

S.Vanlaiphâi-ah te sâwn fooball tournament-ah mi auh luih luih khawpin a lo tal nasa tawh a. Tlangvalho phei chuan an huat rawn a, an khua-ah a châm rei ang tih hlauvin a haw hun tur an zâwt chhên mai a ni. Nulahovin a thawmhnaw sûk an inchuh a, tunthlenga inbiak theih loh phahte pawh an la awm.

Sangau nulaho zingah a hming hre lo an awm lo va, a insawi dan phei chuan Vanawia pawh khân a thik deuh viau a ni awm e. Vawikhat phei chu Laldiheli bânah khan a hming a rawn lang ve nawlh mai a, Sangau khua leh a chheh vel a nghawr nghing nasa an ti. Chu mai a la ni lo; Mizoram kham sâng ber, Phawngpui hmar lama Thlazuang khâmah te sâwn Thaltlâng nula pakhat nen zuan thlâk tumin a kham kotlângah sâwn mittui nen rei ngial an lo inngaihtuah dun tawh a. An thulh leh chhan erawh zawng a sawi duh bik thak lo.   

PU ZAKHUMA chu ka thih hmâ kumah Kanghmun khuaa a awm lâiin hritlângin a man a, a nat vak pawh an hriat mang loh lâiin a liam ta thut mai a. Kanghmunah an phûm ta a nih kha. Ani zawng a thih dâwn thlengin a la harh tha a, Aizawl leh Kanghmun inkârte hi chu hnehsawh tak a ni.

Pa lunglêng thei tak a ni a, lunglêng thei tak tur pawh a ni reng bawk; lunglênna tur sulhnu a ngah em! A thih hmâ lawk pawh khân ni khat chu ‘Khawnge ka hman bawk a, sulhnu hlui chhuiin Thenzawl atanga Kanghmun hi kêin kan kal ve leh reng reng teh ang,” a ti a. Tichuan Thenzâwl atang chuan kein a tlangval lâia a sulhnu chu mittui nen a chhui phei ta alawm. A hmasain Tualvungi Thlan a han tlawh a. He thlan thleng hian a tlangval tirhin Thenzawla a khawmpui haw lam chu a thlenpui nulaten an va thlah a. Mittui rialno thum zet tur an tihtlâk fê hnu-ah harsa tak chungin an inkalsan hrâm a. Mahse chungte chu thawnthu hlui an chang zo tawh a. Khang hun laia amah thlahtute pawhin mual an liam zo ta. Thawnthu hlui kohkir tuma kal zawng a ni teh meuh mai a, mahse tunhmâa vawi engemaw zât a mittui lo tihtlâk tawhna thlanah chuan mittui hul phiangin a ding vang vang a. A lung erawh zawng a lêng ngang mai.

Tualvungi thlân atang chuan zawi muangin a kalsawn a. Thenzawl a awm lâia chawlhni tlai an enjoy-na phaitualhnim te chu a ngai ngaiin a lo la hring dep dup a. Thiani te nen an inbirûksiakna tlângsam bukte erawh chu tunhma ang zawng a ni ta lo. NEC farm-a cowboy awm lâi khân henglai phaitualah hian Ramlaitui nula haw tur nên an lo inchhâwlhruai fo tawh a. Chhipphir nula haw tur kuai pêngin heng lâi ramte hi a lo fanpui hrep tawh bawk.

Zawi muanga kal zelin Kanghmun kal tur Zote khaw nula chhuanvawr ni tlâk thlenga a thut puina Vantawng – khawhthla panna kawngpêng bula thingsepui ding luah thin chu thangkhat liam ta-ah khan an kit tawh a. Mahse an thut dunna tak lungpui erawh chu vanneihthlâk takin a lo la awm a. A hah vang pawh ni chuang lovin chu lungpui lian lutuk lovah chuan a han thu leh chhin a, a thinlungah chuan an hun laia hla hlui an sak ve rawng rawng thinte kha an rawn lang zut zut a, a zai thei tawh si lo.

A rilru hre miah lo car nalh tak takin an rawn tlan pel zut zut a. A taka a thil hmuh leh a rilrua awm chu kum tam takin a inhlat a ni. Chawngchilhi pûk a thleng phei chu a hnuk a ulh a, a hawi pawh a hawi chhuak tha ngam lo. Chu pûk chuan engemaw titak hian a thinlungah thu a la sawi tlat mai a, chuvangin a han tlawh hram ang nge, a kalsan ang a, a damchhungin a tlawh lo hlen tawh dawn? A pahnih chuan a ui dan leh a ui loh dan a inchen reng.

He pûk hi atan chuan khawvela pûk nuam ber a lo ni tawh thin a. Chumi hnu-ah pûk lung tileng ber leh mittui titla tam ber a ni leh a. Tin, he pûk a ngaihtuah chhuah chang hian a lâwm em em a, a nui ru var var thin. A châng leh a thinur a, theihnghilh daih a duh a. A hnu-ah a theihnghilh ang tih a hlau leh a. Chutiang chuan he pûk hian a nunah thu a sawi nasa a, a tah pawh a tahpui nasa thin asin. 

   Hemi ni pawh hian han lût ngam chiah si lo, kalsan phal chiah bawk si lovin kawngpui sirah chuan a ding vang vang a. A thinlunga thu leh hla awm chu ziak chhuak thiam se lehkhabu chhah pui pui volume nga vel lai tur a ni ang. Mahse a hun lâiin a lo ziak ngam lo zo tawh a, chuvangin he pûk atanga Mizo thu leh hla ril tak tak, zirlaibu-ah pawh tel pha tur, Mizoram hi Mizoram a nih chhûnga dai tawh ngai lo tur chu pa pakhat zahzum luat avangin a ral hlen ta a. Mizo fate tan chuan chânna nasa tak a ni.

Chu pûk chuan eng vanga a nunah thu sawi nasa viau nge a nih tuman kan hriat thui pui lo. Chumi ni chuan a han tlawh hram a, a han tahpui vak nge, amah pawhin a beisei phâk loh mittui hul phiangin a kalsan kan hre lo va. A tlawh lo hlen ta nge pawh kan hre lo a nih chu. Tichuan a kal zel a…

Thenzawl atanga a haw phei chânga Buangpui nulaho nen mit tla lek leka an inthlir liamna kawng sir lungdawhte chu lo bo zo tawh mah se a mitthla-ah erawh chuan nimin tluka chiang khân a la fiah a. Lêngi te nen kehthiah vâr siau khawpa an lo zawh thin Vanva lui te chuan en tihrehawm khawpin a thin lairil a fan a ni. Tunah chuan Buangpui kal pelh a châk chhan la dam chhunte pawh pitar bengchhet biak hleih theih tawh mang loh an lo ni vek tawh a. Tunhmâa ‘Khawi maw thingpui hâng, kurtai nen,” a tihngamna inahte lah chuan amah hretu an awm tawh si lo.

Kanghmun nula awm chhun ang angte nen khawmhma awm lo an zawn nilênna tlâng leh mualte erawhchu a ngai tê vek an la ni a. An khaw nula matrict pass hmasa ber nen aidusentil zawnga khawtlâng ngaih an tihthat loh rum rumna dam phei ngâw te erawh chu an lo vât au vek tawh a, lunglên an hnawt tiau zâwk a ni.  

Hemi nia a sulhnu chhui hi a damchhunga a thiltih ropui hnuhnun ber a ni ta awm e. A hnu lawkah sawi tawh ang khan nat lâwk em em pawh awm lovin a boral ta thut mai a ni.

 ZUALA erawh chu Conference atanga pension hlim a ni a, a la tlangval ngang mai. A thiannu Kimi hmel chuai tawh lam tâna insit rilrûk ngawih ngawihna thamin a la inchei smart peih a. A motor khalhtirha artui eisên loh petute kha an lo nuthlawi leh tawh bawk nen; nupui te mitmei vêng miah lova history bu keupui châk tak tak a ngah mai.

A vanglai khan Khawruhlianah khian Conference President tizak rum rum khawpin chaw eia sawmtu a lo ngah tawh a. Fanu nula nei lo nu leh pate pawhin khawdanga an chhungte nula awm hmingin an la sâwm talh tho. Hmar tlângdung hotel neitute zingah khian kal paha “Khawi maw cheng za min lo hmantir lawk teh u,’ han tih mai ngam lohna a nei lo va. Chaw ei kham kamthuah paha han piai mai tur nula ngamtlâk lah chu association din tham zet a nei bawk.

Serchhip tlângdung kawngtluan mai khian ‘thingpui vâr aiin bawnghnute law law a ni ka duh,’ tihpaha fridge hawn nghal mai ngamna in a nei phei thluah a. Baktâwng khaw hnuai kawngsira thei zuar nuho phei chuan an thei zawrhte chu pe tam lo bik nih mawlh an hlau va, a din zeuh tawh chuan an bawr mum mum zel mai a ni. Vawikhat pawh Baktâwngah kan kal ho va. Chumi tuma Khumtung thei zuar nuhovin min ngaihsak ve lo lutuk leh Zuala ringawt an au an au mai chu kan titau haw lo chauh a ni.

Tripura lama a kal changin motor tirit tham zet thilpêk a dawng thin a. Thilpêk dawn hi chin tâwk nei ila tih dan siam rawt thuak thuakte pawh an awm phah niawm tak a ni. A taka rawt thluk chi phei chu a ni kher lo vang.

Sialsûk tlangdungah sawn ‘Tuilum ngat lo chuan ka inbual peih lo,’ tih paha gas thuk tihnun nghal mai ngamna nuthlawi in a hung phei thluah bawk a. Hmuifâng khâm sâng lâiahte sâwn amah avanga zuan thlâk tum uaih uaih, vaneihthlâk taka an man hman hram nula senior pahnih pathum an awm niawmin a sawi. Sialsûk khaw chung ‘Ngei Ngei Tlâng’ te saw khawvel dang a awm tih hre miah lovin Sunday tlâi vawi sawm dâwn lâi chu a lo khaw thim pui thak thak tawh a. Serchhip leh Thenzawl inkâr kawng a zawh apiang sâwn biak hleih theih loh khawp hian a inngaihtuah mûk zel mai a, ngaih a titha lo thei khawp mai. Vantawngkhawthla enpui turin Nilai zan dar kua leh a chanve-ah Thenzawl nula a hruai chhuak thei a, a nula nu leh pate pawhin zu han phal zan amaw le! Tin, Thenzawl leh Haulawng inkâr khuate sawn a pension hnu hian an mittui a titla thar leh fo thin a. Kawngsir tlangsam bukte sawn an vel zing tawh teh asin. Sekhum bûng hnuaiah sawn Ramlaitui nula nen phaitualhnim an lo tlawh bel hun tawh a. Sir Khuma te khua Kanghmun tlangval hovin a nula rim chu vuak thluk tumin an châng thup tawh bawk.

A tleirawl chhuah hlimin Haulawng khuaa Baptist kohhran nuho inkhawmpui chu a lo ti tisa zo vek tawh a. Nuthlawi pakhat a chhaih fuh loh tum erawh chu sawi nuam a ti lo ve khawp mai.

Zuala hian a in chung pastor Ram Thianghlim fangin a rawn hawnsak Jona dawlhtu sangha ruh them kha a zinna apiangah a keng emaw tihtur a ni. Jampui tlangdung an fanna-ah pawh vawikhat chu a in chung pastor hawnsak bawk Davida’n Goliatha a vawm tlukna lungtê kha mi zingah a phawrh a, hmuhnawm an titeh awm asin; ama sawi danin. Miss Mizoram hmasa ber lipstick hman hluite pawh kha a lo kawl reng pawh a ni thei; kei chuan ka hre lo.

Hetihlai vel hi chuan M-a (Lalmuansanga) te pawh pension hun tur ngaihtuah rauh rauh chungin an lo officer luah tawh a. Keini ang tar pension chaurau êk thai tawh vuina mai maia lo kal hman a ni lo; ka thih ni pawh hian Bolero front seat-a thu nui var var chungin Tripura lam a pan luah luah mai a ni. Ka thih ni meuh pawha ka hming lam ri zui miah lo leh chaw bar khat pawh thulh phah miah lovin Zosangi te khua Kanhmunah an riak thla a. Zan dang zawng aiin a la mu tui zui.

David Sailo pawhin ‘Pune-ah ka kawmiti dâwn’ tih pahin ka thih ni chuan Lengpui a thlawh chhuahsan vung vung a. Thlawhna chhûngah chuan sâp putar pension tihtur dang hre lo ziak, ‘Pension hnua nupui te tihlawm zui zel dan’ bu a chhiar veng veng mai a ni. Keini ang tar kiring thi ve mai maiin an chhuah a kham lo. Hmangaihsangi pawhin a nauteho a indantir vek hnu-ah Champhaia an inpui chu amahin a luah a. Ka thih thu an han hrilh chu, “Tu Chhuanmawia maw?” a lo ti hê haw a. An han sawifiah ngial hnu-ah pawh, “A thi daih tawh emaw ka ti asin?” a ti duh chauh tawh a ni.

Tunhmâ, kan tleirawl chak vanglai chuan tar ve thei lo leh na thei ve lo emaw ka inti mai. Tar tih leh upa tihte hi ka hring nun dictionary-ah a awm ngai lo va. Chutihlaia pitar putarho pawh chu tunhma lama thalai ni vek tawh an ni tih pawh ka ngaihtuah lo. Tarsa hrim hrima piang ni mai turah ka ngâi a, keimahah ka inbel chhin ngai lo reng reng.  

Ka thih ni chuan mi hrang hrangin thu an sawi a. A sawitu tam zâwk chuan a hma lama sawi tawh ang khan, min ui thu aiin nat lâwk em em awm lova ka thi vannei min tihzia leh awm min tihpui tawhzia an sawi ber a. Min ui thu sawi ve ngei tura ka beisei, Zova (Zothanzauva) te leh Dana te meuh pawhin mipui nawlpui sir lama paho titina-ah nuihza min siam san mai mai a ni. A nuihza sawi tur hria hria-ah te chuan an la tang lehnghal.   

Vuina hun serh a zo va, Thingsulthliah Camp Area thlanmual lam min pan pui chu ka ruang zui an tlêm kher mai. Aizawl lam atanga rawn kalho phei chuan hun serh chu zo thuai thuai se, thlanmual lamah min phur liam thuai thuai se haw vat kha an duh ber tawh a. Chuvangin vuitu pastor tawngtai zo ‘Amen’ leh an chuanna tur motor lam melh an rual a ni ber. A hmingin ka ruang chhuak tur chu min han thlir liam hram a, tichuan bus-a luh leh nuihza siam an rual a. Zemabawk dâi an thlen phei chuan dul thuar na urhin an nui tawh a ni.

Tichuan, kei, tar leh thih te chu midang ta tur emaw ti ngar ngar thin chuan chumi ni chuan khawvel hi ka lo chhuahsan ve ta reng mai. Leiah hian engmah ka rawn luh pui lo va, engmah ka chhuah pui bawk lo. Tihian a ni têlin mi thinlung chu sawi loh, ka chhungte thinlungah ngei pawh chuan ka lâng khat tial tial ang a. Kum sawmte a han vei leh meuh chuan piang ve lo ang vang vang ka ni tawh ang. Engemaw changa min rawn hre chhuak ve zauhtute pawhin tar thi hriatin min rawn hria ang; chu chu ka chan tâwk chu a ni mai. Mahse ka vui lo.

Khawvelah hian min hre miah lo nula nalh tak tak an la vei suau suau reng ang a. World Cup pawh a ropui dan pangngai reng a la ni ang. Christmas pawh Christmas a la ni reng dâwn. University-ah mithiam rual an vei suau suau reng ang a, damdawi inah mi an la mu thep thuap ang. Lammualah inkhel enin mi an âu dur dur reng ang a. Traffic pawh a tâwt ngaiin a tâwt reng ang. Revival crusade-ah mi an inhlan chur chur reng a, biak in dâr ri pawh a pangngai reng a la ni. Khawvel tâwp hnaih tawhzia sawitute pawhin an la sawi hnai reng.

Khawvel chuan hma a sâwn zel ang a, ka dam ve lâia thil changkang tak tak nia kan hriatte kha chu thangtharho chuan nuihza siam nân an la rawn hmang vel mai mai dâwn a ni.

Thangkhat lian a han ral leh meuh chuan a tira ka thlanlung mâwi tak leh fiah taka thu inziakte kha an lo rawih tan ta a. Chhungte thi tharlâm thlan tlawh paha ka thlanlung ziak chhiar tum palh mialte pawhin an chhiar hleih theih tawh loh khawpin a fiah tawh lo va. A tir lama chei hlawh ve zauh zauh kha, ka tuteho chuan chei that enah pawh an en tawh lo. Chutih hunah meuh chuan khawvelah hian hriat ka hlawh lo lehzual tak tak ta. 

 

Kan vanglai chuan nula tu tute emaw chuan, an chhiat an that chu thuhran, min lo duh der ve phian pawh a ni thei a, nu leh pa thenkhatte pawhin makpa atan min it der ve viau pawh a ni thei asin. A nih loh leh ka vanglai chuan vengkhat pa lar, titi thiam, mi awh rawn ka lo ni ve tawh thin a ni mai thei. A nih loh vêk leh nulate ngei rawn tlangval zei lo tak niin ka lo ui chuang lên ve mai mai tawh pawh a ni thei. Pa rethei berh tê, tûma hriat tham loh pawh ka ni thei; mahse thih tawh hnu chuan mihring chunga khuarel hi tû chungah mah a lo danglam tak tak lo. Kei pawhin ka chan tâwk ka hmu ta. Thlanmual sir kil khata thlan chul rap tawh, tuma chhiar that peih tawh loh khawpa ziak fiah lo, a thlanlung pawh khem deuh nual tawh chauh chu khawvela ka chan tâwk a ni; mahse ka vui lo ve. Ka chunga khuarel thil thleng hi tuman an pumpelh thei bik si lo va.