KAN RAM HI

       India ram zâu hei ang, mihring maktaduaih za têl tak meuh meuh zinga ram te reuh tê, a mihring pawh ui hum lek tur awmna kan ram hi kan duh emaw, duh lo emaw, Pathianin kan ram atana min pêk, kan pian leh murna tura min ruat sak a nih miau avangin kan ngâi viau lo thei lo va, kan sawiselin kan fak lo thei thin lo; kan ram neih chhun a ni miau si a.

Hnam tinin kan sakhaw vawna zir te, kan awmna ram leilung leh vun rawnga zirten duhzawng leh ngainat zawng kan nei hrang theuh a. Kan mihring ngaihsan zawng pawh a inang lo va, an thiltih tihtheih zawng leh tuina pawh a inang hek lo. Brazil ram atanga football thiam tak tak an lo chhuak te khu a mak lo; India ram atang te hi chuan football thiam Pele-a te, Beckham-a te leh Tennis thiam Roger Federer-a te emaw chu lo chhuak turin kan beisei thei lo vang; Kapil Dev -a te ang khu nûi khi vun se la kan inhmeh hrih viau a ni.

Kum za kal taa Mizote chuan mi taima, huaisen, tlawmngâi, sa kâp thei an ngaisâng a. Khawtlanga dinhmun sâng chelhtute pawh chutiang mite chu an ni zel ti ila kan daw tam lo vang. Taima an ngaihsan avangin hna an thawk nasa a, buh leh balah an intodelh thei; sa kâp thei an ngaihsan avangin sa kâp thei pasaltha an tam bawk. Mi huaisen, thian chhan thih ngam, tlawmngai bawk site chu khawtlânga mi zahkai pha an ni a. Chu chuan Khuangchera te, Taitesena te, Chawngbawla te leh Vana Pa te chu Mizo history-a hming dai ngai tawh lo tur nihna a pe a ni. Tin, thatchhia an ngainêp a, thalai dam reng tân awllên lai a nih loh chuan ina awm mai mai ngam a ni lo. Kutkem nei te, tualthat te, zu ruih ching te tân nupui pasal zawn hmuh a harsa.

Tin, kum za hma lama Mizo nun chu a mâwlin a thianghlim a, khawhawi a la zim a, khawvel hmasawnna lo  hmachhawn ve zel turin a inbuatsaih lo va, a hriat pawh an hre lo. Pa thil inti hre deuh titi thiamin ‘changpât hi a ê a ê a khawvel a lo awm mai ani’ an tih lai khân Pathianin kan anpuia a siam khawvel letliama kan mihring puite chuan Charles Darwin-a zirtirna Evolution Theory’ te chu an lo buaipui luih luih tawh a. Astronomy lamah Sir William Hershel Jr   pawhin double stars, nebula leh cluster tam tak a hmuchhuak tawh bawk. Tin, Germany lamah Heinrich Herzt -a chuan electro-magnetic wave chungchangah ngaihdan mumal tak a nei tawh a. Atom bomb siamna lama hmahruaitu tih ve mai theih Ernest Rutherford-a te thian dun chuan radio activity leh atom nihphung (nuclear nature of the atom) chungchang an lo khel fê tawh bawk.

Economics lamah chuan chutih laia thurin lar ber laissez faire economy, Adam Smith-a te, J.B.Say-a te thurin chuan dodal a hlawh tan a. Karl Marx-a leh Engels-a te thian dun ziak ‘The Communist Manifesto’ (1848) leh  Das Capital ( 3 Volumes. 1867-94) te chu chutihlaia Bristish economic system rawn do nasa ber ber tute an ni.

Politics lamah nise Japan, China leh South Africa rama Dutch hoten English ho chu an chhang kham tan a. India ramah pawh December 1885 khan Pune-ah Indian National Union chu Indian National Congress tia thlakin sapho nghâwngkawl hlih dan buaipui tura hmalâkna a intan ti ila a sual awm lo ve. A hma 1857 kum khan India ram atanga sapho hnawh chhuah tumin an lo inkhuainuai vak tawh bawk a. Zalenna duh mi tam takin an thih phah a ni. Tichuan English-ho duh lohna thlipui tleh zelah Bipin Chandra Pal te, S.Banerji te, Bal Ganghadar Tilak-a te chuan huaisen takin British ho chu an do ngam tawh a  ni.

Khitiang taka khawvel dangin hmasawnna rahbi thar an zawn lai khian kan pi leh pute erawh chuan Hringchâr thlang lamah midang an awm ve tih pawh an la hre mang lo a nih chu! Sâpho rawn chhuah tirh vel lai, kum za chuang zet liam taa Mizo economic system te, political system te, sakhua leh zirna lama kan institution neih that ber ber(Zawlbuk etc.,) te chu an mâwlin an la hniam a, chuvangin Oxford University leh Cambridge University neitu, khawvel culture chak ber, Bible leh Shakespear-a neitu ni bawk English ho lakah chuan khatih laia kan ram zirna tha ber Zawlbûk chhuakte kha chu tlâwm lo chi pawh an ni lo. Tin, chu bâkah he hun pawimawh, hun hlui kawr hlip a, hun thar kawr kan inbel dawn hian kan hâk tâwk leh inhmeh zawng min thlan sak thiam ram pum huap hruaitu kan nei lo va, chu chuan nasa takin min tichau bawk a ni.

Hmun thenkhata miten an nin fê hnu-ah sâp ho hi hmu ve chauh kan ni. Sâpho chuan kan institution hrang hrangte min rawn thiah sakin Bible-a innghat ngaihdan thar leh duhdan tharte min rawn siam sak a. Chu chuan kan khawhawi a tizau tan a. Thlarau khawvela Rih Dil pel ngai lo khân Jordan lui dâi kâiin Jerusalem khawpui leh Kalvari tlâng kan hmu pha ta a. Rinna nena Galili dil hleuh kâi tawh leh Kalvari tlâng lâwn chhuak tawhte ngat phei chu khawvelah hian a hnam phû tâwkah chuan kan tam ber hial awm e. Hnam fing zâwk leh chak zâwk Europe mingo hovin an ruih pui, Calvin-a te, Luthera te vahvaih pui hnu, John Banyan-an a mangphan thin Chanchin Tha chuan kan thinlung a chhun tlang a; min chin phar dan chu nasa tak a ni. Kum za a lo chuang ve ta der mai.

Hnam culture leh sakhua chu then hran theih a ni lo. Kristianna hi kan sakhua a ni a, kan culture a ni bawk. He sakhaw thar hian kan sakhaw hmasain thih hnua mihring thlarau kalna kawng min kawhmuh thin kha min rawn thlâk sakin Kalvari tlâng lam min hawi tir a ni ringawt lo va; kan culture lungphum a tinghing a ni.

He sakhua kristianna hian kan incheina te, kan ei leh in duh zawng te, kan mihring ngaihsan zawng te, sual leh tha kan tehna ramri pawh a rawn sawn dawrh mai ni lovin kan hlauh zawngte nen lam min tihdanglam sak a ni. Nakin deuhah chuan kan sakhaw thar avanga kan khaw hawi lo zau ve ta deuh chuan Bethlehem leh Jerusalem chauh min hmuh tir lo va, khaw ropui zâwk Paris, London, New York leh Los Angels te kan hmu pha ta hial a. Chanchin thain a rawn luhpui ni lem lo bawlhhlawh chi hrang hrang a rawn luang lût bawk a. Hengte hian khawvel awm chhung chu min chim ve reng dawn a ni.

Tin, tunhma chuan Mizoram hi ngaw durin a khuh dum hlup mai a. Chutiang ngaw dur thing khawsa lian pui pui kârah chuan thelrêt tualto pawh a awm ve thin a. Chutiang thelrêt hnâi chu hlûmin phâi vâi an dawr a, chi thleng nan an hmang thin a ni. Tin, Mizoram hi pangpâr mâwi leh rimtui tak tak vulna leh Zotui thiang luanna ram a nih avangin sava hram thiam mâwi tak takte pawh namen lova tam an chêng thin. Hnuai lamah lah sakhi leh sazukte chu an tam narawh. Sâi leh ramsialte tan phei chuan an zalenna ram, pardise tê nâu a ni ringawt e.

Mahse tunah chuan kan lo neih danin a zir loh avang leh keimahni mihring nunphung hrim hrimin a phâk loh bâkah mawl luat avangin chûng ngaw dur pui pui kâra sava mawi tak tak zi hut hut thinte chu an lo rem ta duak mai a. Thelrêt tualto leh pangpar mâwi, thei kung duhawm tak tak bâkah a neitu hmasa sâi leh samakte chu Aizawl leh a chhehvel ram laili-ah te phei chuan awm lo zawn ang mai a ni; beisei chi a ni lo va, mang lamah pawh kan hmu pha ta lo chu a ni ber e.

Tin, Mizoram hi tlâng zum sil sel tamna hmun a ni a. Chung tlâng sâng inkârah chuan  zâwl zau nuam tha, leilet zau tâwk siam a, buh kham khawp mai bâkah ram danga thawn chhuah khawp tharna tur hmun rem tha a awm mang lo. Mi rama phaizâwl zau pui pui, kham khawp bâkah ram danga thawn chhuah fê tham an tharna ram leilung tha leh tlâng chung zâwl ram rai nuam tak tak hmu tawh tân chuan lungawi a har mai thei e. Pu Rokunga phei chuan hlain;

Kan ram riang tê hi zâwl zâu a 

     vâng e,

Tlâng sâng leh khamrâng lêngkir

    hmun hi;

A then phaikuam suang lungpui

   an ngirna te,

Fang rawng hmun tur a vang lei

  leh nân e,

A mâwi mah ti ila lung a âwi lo”

a lo ti a. Hla danga ‘Kan Zotlang ram nuam hi Chhawrpial rûn i iang e” titu mah nise a nihna diktak a thlir chuan a lungâwi zan bik lo a ni maithei.

He ram neitu Mizo hnahthlâk ho hian kan neih chhun hi chei mawi belh zel a, kum za lo la awm tura thangtharte chen zui zelna tlâka tuai hnum lam kan la rilrûk pha vak lo niten ka hre thin. Tunhnaiah hian mi thahnemngai thenkhatin nungchate leh thing leh mau dim a tulzia au chhuahpuiin thing phun te pawh han uar thar deuh mah ila a mi nawlpui ang hi chuan khua a la vâr lutuk lo. Uluk taka kan ram neihchhun zim tê hi fa chuam duata duat âiin a chhûnga ramsa awm chhun hmuh phâk apiang tihhlum a, ei khawm luih luih leh ram ngawte pawh hal hluah hluah a, kum khat lo atana neih rem duak kha kan duhdan leh phâk tâwk a la ni a. Chu chu maupui hmun tha leh ngawpui kan thlir dan chu a la ni. Kan lui sanghate pawh hi tun aia nasâa sawisak dan kan hre lo va, kan sawisa nasa lo zâwk a ni. Atom bomb-te hi nei ila sangha vawm nan kan hmang duh mai awm e; chu chu a ni kan rilru chu.

Hnam khawfing chah hun hi a rei duh khawp mai. Kan sakhaw vawn a zir te, kan awmna ram sik leh sâ leh eizawnna a zirten a inrei hleih theih viau bawk. Keini Mizote hi khawvel changkâng zelah hian a hnufum pâwlah kan tang reng dawn nge mi hmahruaituah kan tang dawn? Nge hnam tam tak angin mi hriatpui lêm loh hian kan thâmral mai ang? Tunlai khawvel changkanna chi hrang hrang hian kan duh emaw, duh lo emaw tuilian angin min hnawl tel ve lo thei lo va. Khawi vaukamah nge kan inhai chhuah dawn tih chu kan chuanna lawng kartu ram hruaitute leh a kartu tur thlang chhuaktu lawnga chuang ve mipui ho kutah a innghat lian hle a nih chu. Mi ramte chuan min han pui ve bawk thin mah se inchawm hausak tak tak theih a ni dawn si lo. Khawi lam kawng nge kan zawh dawn tâk le?